Kabsan sa kinabuhi ang driver sa usa ka Isuzu Elf truck samtang angol usab ang pahinante niini human aksidenteng nahulog ang gisakyang behikulo sa daplin sa highway sa Purok F, Barangay Dualing, Aleosan, Cotabato kaganihang alas 3:00 sa hapon, Abril 23, 2024.
Giila ang driver nga si Marjun Permento, 35 anyos, minyo samtang ang pahinante usab niini giilang si Aldrin Galinsuga, 43 anyos, minyo ug managsamang lumulupyo sa Barangay Santo Niño, Tukuran, Zamboanga del sur.
Sigon sa saysay sa pahinante sa fish car, gikan matud pa sila sa Panabo City aron magdeliver ug isda ug pauli na unta kini sa Zamboanga del Sur sa dihang nahitabo ang insidente.
Dugang pa niya, nga sa dihang pagawas na sila sa Aleosan, Cotabato Province kalit lang nag-ikis-ikis ang nasangpit nga truck ug largong nahulog kilid sa highway.
Tungod sa kakusog sa pagkahagbong, nibanga ang fish car sa punoan sa lubi ug naputol usab ang tapad niini nga kahoy.
Swerteng nakalingkawas sa kamatayon ang pahinante nga nakaangkon lamang ug mga pangos sa kalawasan apan ang kauban niini nga driver nabangga ang ulo sa dakong tipak sa kahoy nga niresulta sa iyang hinanaling kamatayon.
Sa kasamtangan, nakuha na sa pamilya ang patay’ng lawas sa biktima.