Gikatakdang itukod sa Department of Science and Technology ang usa ka Science Centrum dinhi sa Zamboanga del Sur, usa ka mahinungdanong inisyatiba sa tuyo nga mas mapalambo ang science literacy ug madasig ang kabataan sa pagpili og career sa natad sa Science, Technology, Engineering ug Mathematics kun STEM.
Ang nasangpit nga proyekto namugna pinaagi sa hiniusang paningkamot sa Provincial Local Government Unit (PLGU) sa Zamboanga del Sur ug sa Department of Education (DepEd) Zamboanga del Sur Division.
Ning bag-uhay pa lang, naggahin og ponding P3milyones ang Provincial Science and Technology Office (PSTO) sa Zamboanga del Sur gikan sa Grants-in-Aid (GIA) program sa ahensya. Pormal kining gidawat ni Zamboanga del Sur Gov. Victor J. Yu kauban sa mga representante sa DepEd Zambosur Division sa usa ka turnover ceremony kaniadtong Hulyo 30, 2024.
Ang Science Centrum usa ka pasilidad nga magpasundayag sa 20 ka mga interactive exhibits nga gidisenyo aron mas mahimong accessible ug interesting ang mga science concepts ug theories ngadto sa mga estudyante sa lalawigan.
Ang katumanan sa maong proyekto usa ka timaan sa dakong pagtagad ug pagsuporta sa Yu administration sa edukasyon nga maoy susi sa pag-ugmad sa kaugmaon sa kabataang Zambosurian.
(Source: Victory Zamboanga del Sur Facebook page)