Zambonga del Sur – MOKABAT sa 6 ka mga barangay ang apektado sa pagbaha sa lungsod sa Kumalarang, Zamboanga del Sur tungod sa way puas nga pag-ulan dala sa intertropical convergence zone kun ITCZ sukad adlawng Dominggo.
Sumala sa Provincial Disaster Risk Reduction Management Office, nakasinati sa pagbaha ang Barangay Salagmanok, Poblacion, Lantawan, Sicade, Gawil, ug Diplo.
Sa inisyal nga datos, kapin 800 ka mga panimalay sa lungsod ang naapektuhan sa flashfloods diin 3 ang gianod sa tubig-baha ug 3 ka balay usab ang naigo sa landslide.
Dugang pa, mokabat sa 77 ektarya sa basakan ang gibanwas usab sa baha ug mihapay sa kamaisan sa 28 ka mag-uuma.
Sa mga litrato nga gipost sa mga netizen sa social media, makita nga misulod na ang tubig-baha sa mga balay ug establisyemento sa lungsod hinungdan nga mibakwit na ngadto sa evacuation areas ang mga apektadong residente.
Nagpadayon pa karon ang damage assessment nga gihimo sa LGU ug PDRRMO aron mahatod gilayon ang tabang nga gikinahanglan sa mga apektadong residente.
Nakaposisyon na usab ang mga ayuda nga gigahin sa Provincial Government alang sa mga biktima sa maong kalamidad.
Via Marlon Panares
Photo courtesy of Kumalarang MDRRMO