General Santos City – Kapin sa P3 milyones nga kantidad sa shabu ang nasakmit sa mga personahe sa Regional Police Drug Enforcement Unit (RPDEU) 12 ug GenSan PNP sa ilang anti-illegal drug operation nga miresulta sa pagkasikop sa usa ka high value individual lakip na ang manikurista sa Purok Silway Fatima, Brgy. Dadiangas West, General Santos City, sayo sa buntag sa Nobyembre 9, 2024.
Si Police Brigadier General James E Gulmatico, Officer-In-Charger sa Police Regional Office 12 niila sa mga dinakpan nga sila si alyas “Dodong”, 46-anyos, ug ang live-in partner niining si alyas “Rose”, 19-anyos, manicurist, gikonsiderar nga Street Level Indibidwal, kinsa kaubang residente sa Barangay Dadiangas West, General Santos City. Sa report nga nadawat ni PBGen Gulmatico, nagkanayon og operasyon batok bawal nga druga ang kapulisan gipangulohan sa mga personahe sa RPDEU 12 sa pakigtambayayong sa mga operatiba sa Police Drug Enforcement Group-Special Operating Unit 12, Regional Special Operating Group 12, Regional Intelligence Division 12 ug General Santos City Police Office-Police Station 1.
Nasikop dayon sa maong operasyon ang mga suspek human kini namaligya og usa ka gramo sa shabu ngadto sa usa ka police poseur buyer bugti sa P1,000 pesos nga genuine peso bill nga gigamit isip buy-bust money. Nakuha gikan sa naasoy nga maglive-in partenr ang 515 gramos nga shabu nga nagkantidad og P3,502,000.
Kasamtangang giproseso ang pagpasaka og kasong paglapas sa Comprehensive Dangerous Drugs Act of 2002 batok sa mga suspek. Gidayeg gayud ni PBGen Gulmatico ang mga operatiba sa ilang malampusong operasyon ug gihingusgan ang kampanya batok sa ilegal nga drugas paingon sa gilaoman nga malambuon ug luwas nga Bag-ong Pilipinas.