Mangisayangkat manen ti gobierno probinsial ti marunggay iti masungad nga lawas.
Inlawlawag ni Mr. Carino, mangidadaulo ti Sustainable Development Center ti gobierno probinsial a daytoy ket saan a ti ordinario a klase ti marunggay.
Imabatadna a daytoy ket naggapo ken Mrs. Gena Matzouka a nasertipikaran a ‘’good seed’’.
Segun kenkuana, lima a kilo a bukel bukel ti marunggay ti intedna nga inpatubo ti probinsia.
Inbunannagna a gapu ta dadakkelen dagitoy ket plano a maiyuna a maimula ti sangaribu tallo gasut.
Nupay kasta, impalgak ni Carino nga immabot iti sangapulo ket tallo ribu lima gasut ti nagtubo iti inpatuboda nga uppat ket kagudua a kilo.
Kunana a maimula amin dagitoy iti asideg ti agriculture office ti suidad ti Laoag iti Brgy. Camanggaan agsipud ta ditoy ti kapintasan ti daga para iti marunggay gapu ta ‘’sandy clay loam’’.
Malaksid iti daytoy, inlawlawagna a naammoanna a ti bayad ti maysa a litro ti moringga oil manipud iti bukel ti marunggay ket lima a ribu a pisos.
Innayonna nga ita laeng a maawatanna ti rason a pursigido ni Senator Imee Marcos a nangitandudu iti panagmula ti marunggay. (OIC Rodrigo Sadian, RPN DZRL Batac)
(Source: Provincial Agriculture Office)