Anaa na sa 17 ka mga barangay ang nalugwayan og ayuda sa kagamhanang lokal sa syudad sa Dapitan pinaagi sa Serbisyo Bilis sa Barangay.
Samtang nagapadayon pa ang pagbisita sa 37 ka mga nahabilin nga kabarangayan aron mahatagan ang mga katawhan sa “555” nga relief food assistance nga mao ang 5 ka kilo sa commercial rice, 5 ka mga sardinas, ug 5 ka noodles.
Sumala pa ni Mayor Rosalina G. Jalosjos nga gihatagan niya og gibug-aton ang paghatud og mga ayuda karung panahona sanglit apektado ang tanan nga mga katawhan niining nasinati nga pandemya.
Mando sa mayor nga walay pagpihig ug walay bulok sa pulitika ang pagpang-apod-apod sa ayuda.
Kini nagabase lamang sa matag pamilya nga residente sa usa ka lugar ug giila sa ilang purok lider/presidente o mga barangay opisyales.
Karung adlawa andam na usab nga mobisita ang kagamhanang lokal sa syudad sa Brgy. Larayan diin adunay mokabat sa 819 ka mga pamilya ang gilauman nga makadawat sa hinabang nga mga pagkaon.
Hugtanon usab kini nga gisuportahan sa mga kadagkuang opisyales sa syudad ilabina na ni kanhi kongresista Bullet Jalosjos ug Cong. KuyaJon Jalosjos.
(Source: CITY INFORMATION DIVISION-CID-Dapitan Facebook page)