Naan anay a pannakaadal iti nainkalintegan a presyo ti karne ti baboy iti man live weight wenno naparti a karne ti baboy ditoy Ilocos Norte.
Daytoy ti gagem iti inisponsoran nga ordinansa ni Sangguniang Panlalawigan Member Hon. Domingo Ambrocio nga inpilana iti Sangguniang Panlalawigan.
Segun kenkuana, napanunutan na ti nangpanday iti nasao nga ordinansa tapno makita ken makuwenta a nasayaat iti presyo ti baboy ken awan ti maabakan iti man biang dagiti agtartaraken ken aggatgatang.
Namunganay daytoy gapu iti panagreklamo dagiti umili kangrunaanna dagiti agtartaraken ti baboy gapu iti kinalaka ti presyo ti live weight nupay nangina met iti presyo ti naparti a karne ti baboy.
Kunana a masapul nga adda iti naituding nga umno a presyo iti live weight gapu ta saan nga agpapada ti panaggatang dagiti partidor nga agay ayam iti 110 agingga ti 120 ti kada kilo idinto a 240 agingga iti 250 met ti kada kilo iti presyo dagiti naparti a baboy iti merkado publiko.
Kunana nga ad adda manen a nagdanag dagiti backyard hog raisers gapu iti agraira a sakit dagiti baboy nga African swine fever nangruna ket daytoy ti kangrunaan a pamastrekan dagiti agindeg iti away wenno rural areas.
Iti baet daytoy, impasigurado ni bokal Ambrocio nga aramidenna amin a kabaelanna tapno matulungan dagiti agtartaraken iti baboy nangruna ita nga adda ti agraira a sakit dagiti taraken ti ASF.
(Source: Provincial Government of Ilocos Norte)