Iriga City – Nakalockdown ngunian an banwaan nin Baao poon kasu-odma, matapos na magpositibo an saros a mga head of office kan local na gobierno na nagkaigua nin history of travel sa metro manila asin iba pang parte kan nasyon.
Nag-desisyon si Mayor Jeff Besinio na dagos ng ilockdown an Munisipyo tanganing dai na ma-expose an iba pang mga empliyados asin taw’anan nin buelo an disinfection sa lugar mientras na magkakaigua nin halawig na bakasyon huli sa simana santa.
Katakod kaini, nangapudan an alcalde sa gabos na magsunod sa tamang protocol asin pirming magsupong nin face mask asin face shield kasabay kan pangapudan na ibitaran na nguna an pagparaluwas kan mga mayo man sanang importanteng kalakawan.
Isolated na an head of office asin naka-self quarantine naman an mga empliyados na nagkaigua nin close contact sa nasabing opisyal. (Melvin F. Barayoga, RPN DZKI Iriga OIC)
(Source: LGU Bato)