Cagayan de Oro – HINIUSANG giuyonan sa konseho sa sesyon sa Lunes nga gidumala ni Konsehal Romeo V. Calizo ang ordinansa nga naghatag og katungod ni Mayor Klarex Uy sa pagpirma sa Memorandum of Agreement (MoA) tali sa 1st Valley Credit Cooperative, City Hall Employees Multipurpose Cooperative, COA Prime Investors Multipurpose Cooperative, King Multipurpose Cooperative, Oro Savings and Sharing Multipurpose Cooperative, Xavier University Community Credit Cooperative ug sa Department of Education-Division of Cagayan de Oro.
Cagayan de Oro City Councilor Suzette Magtajas Daba
.
Ang MoA naglangkob sa kolaborasyon alang sa pagtukod og Teen Center alang sa Tignapoloan National High School (NHS), San Simon NHS, Tagpangi NHS, Iponan NHS, Macasandig NHS, Pedro Oloy N. Roa Sr. NHS, Carmen NHS, Bulua NHS, Lapasan NHS, Angeles Sisters NHS, Patag NHS, Pagalungan NHS ug Canitoan NHS.
Ang kolaborasyon nagtinguha sa pag-estabilisar og facilidad nga magamit sa mga tinun-an sa maong mga tunghaan nga maghatag ug tukmang impormasyon sa sekswalidad ug reproductive health, programa kabahin sa panglawas, mental health ug ilabina ang isyu sa teenage pregnancy ug uban pa.
Samtang sa laing bahin, gipasalamatan ni Konsehal Suzette Magtajas-Daba ang unom ka kooperatiba sa pakigtambayayong aron matukod ang 13 ka teen center diha sa napiling tunghaan sa dakbayan.
Ang ordinansa nga gipalabang sa konseho alang sa maong katuyoan gipaluyohan sa Komite sa Edukasyon ni Konsehal Suzette Magtajas-Daba.
News and photo courtesy of CdeO City Council