Pagadian City – Gipanganlan ni Zamboanga del Sur Police Director PCOL. Roel Lami-ing ang duha sa upat ka mga suspek sa pagpatay kang Brgy. Tuburan Punong Barangay Raymundo Albiar sa usa ka Press Conference adlawng Huwebes, September 9, 2021.
Giila ni Lami-ing ang mga suspek nga sila Joseph Andos a.k.a. Butchoy ug Julie Benabaye a.k.a. Gaga ug laing duha ka John Doe’s.
Gibutyag ni Lami-ing nga malampusong napasaka na ang kasong murder subay sa Article 248 sa Revised Penal Code batok sa mga suspek sa City Prosecutor’s Office adlawng Huwebes pinaagi sa Pagadian City PNP ug pag-asistir sa Special Investigation Task Group.
Kahinumdoman nga duha ka adlaw human sa pagpatay kang Albiar, usa ka Special Investigation Task Group ang gimugna sa Provincial Police nga maoy motutok sa imbestigasyon sa kaso. Gilangkuban kini sa City PNP, NBI, Anti-Cybercrime Group, Highway Patrol Group ug uban pang law enforcement agencies.
“With our collaborative efforts, we are happy to inform the public that this case is already solved… We have done our job. Pinaghirapan po ito ng ating mga investigators at kapulisan…,” pahayag ni Lami-ing.
Si Kapitan Albiar way kukaluoy nga gipusil sa riding-in-tandem kaniadtong Agosto 25, 2021 samtang nag-washing sa iyang sakyanan gawas sa iyang balay sa Brgy. Tuburan ning siyudad. Sa mitumaw nga CCTV footages, naila sa PNP ang mga gigamit nga motorsiklo sa krimen lakip na ang hitsura ug gisuot sa mga suspek.
Labot sa koneksyon sa maong mga suspek, gipahayag ni PCol Lami-ing nga ibutyag nila kini kung makuha na ang dugang impormasyon samtang nagpadayon ang imbestigasyon sa maong kaso. (ZDS Press Bureau)
(Source: Pagadian City Police Station, photo courtesy of Pagadian News Icon)