Cebu City – Gipasidan-an sa Department of Agriculture o DA 7 ang mga lokalidad sa pagpangandam sa bisan unsang motumaw nga kamatay sa mga baboy sa ilang lugar sanglit nagkaduol na sa rehiyon ang ASF o African swine fever.
Si Gregolito Bunado, Program Coordinating Officer sa DA 7, miawhag sa mga municipal agriculturists ug officers pagpangita og kalubngan sa culled swine sud sa 500-metros nga radius aron kapugngan ang pagkatap sa virus.
Suma pa ni Bunado, kinahanglang hingusgan ang ASF watch sanglit molanat kinig tulo ngadto sa lima ka tuig sa pagpahiuli.
Matod ni Bunado, gawas sa preventive measures, kinahanglan usab mangandam sa mas grabe pang insidente.
Sa paghingan og pipila, ang mga preventive measures naglakip sa pagsangkap og disinfectants ug ubang ekipo sa disposal, ug massive information and education campaigns sa lukop lalawigan.
Ang provincial veterinarian sa Siquijor, Dr. Bernardita Tabada, nagpahinumdom usab sa tanang LGUs ug mamuhiay og baboy sa probinsiya nga ipa-insured ang mga hayop kay alarming na ang hulga sa ASF.
Gitambagan ni Tabada ang mga concerned LGUs ug raisers nga ipalista ang ilang binuhi sa insurance para maka-avail sila sa indemnification sa DA. (Jhon Tadlip/JTY)
(Source: Department of Agriculture-7)