Misaad ang labing menos 25 ka mayor sa mga lungsod ug siyudad sa Probinsya sa Sugbo nga ilang buhion pag-usab ang ilang Local Price Coordinating Councils (LPCCs) aron mapugngan ang dili makatarungang pagsaka sa presyo sa mga palaliton sa merkado.
Ang lakang gihimo aron mapalig-on ang pagmonitor sa presyo sa mga basic goods sama sa bugas, gas ug uban pang panginahanglanon, ilabi na nga adunay tensyon sa Middle East nga posibleng makaapekto sa presyo sa mga produkto.
Ang desisyon gihimo human sa hangyo ni Gob. Pamela Baricuatro atol sa tigum uban sa mga mayor ug mga ahensya sa gobyerno sama sa Department of Trade and Industry, Department of Agriculture ug Department of Energy sa kapitolyo niadtong Marso 12. Matod sa gobernador, kung magkahiusa ang mga lokal nga lider ug adunay aktibong price monitoring, mas mapugngan ang mga negosyanteng mosobra og patong sa presyo.
Sumala ni Mayor Cesar Suan, ilang hatagan og prayoridad ang pag-reactivate sa LPCCs sa mga lungsod sa Cebu. Giingon usab sa DTI nga karon 11 pa lamang ka LGU sa probinsya ang adunay aktibong LPCC. Bisan pa niini, nagpasalig ang ahensya nga stable pa gihapon ang supply ug presyo sa mga basic goods ug wala’y rason nga mag-panic buying ang publiko tungod kay adunay igo nga suplay sa nasod sulod sa tulo ka bulan.
Samtang, gihangyo usab sa Department of Energy ang tabang sa mga mayor sa pagmonitor sa suplay ug presyo sa fuel sa ilang lugar. Giingon sa ahensya nga kadaghanan sa fuel sa Pilipinas gikan sa importasyon, busa posible kini maapektuhan sa tensyon sa Middle East.
Bisan pa niini, nag-andam na ang gobyerno og mga plano aron masiguro nga magpabilin nga stable ang suplay ug presyo sa lana sa nasod.
Source: Cebu Province PIO
I via Renante Socia Lada