Ning bulan pa lamang sa Disyembre gipangandaman na sa kagamhanan sa Misamis Oriental labina gyud sa buhatan sa Provincial Tourism Office ang kapistahan sa lalawigan ug kasaulogan sa Kuyamis Festival. Usa sa highlights sa maong selebrasyon ang pagpili sa mahimong Miss Kuyamis nga anaa na sa ikalima nga edisyon.
Niadto lamang adlaw nga Sabado, Disyembre 5, 2020 sulod sa Teatro sa El Salvador City Hall gipahigayon sa buhatan Provincial Tourism sa pagpanguna ni Provincial Tourism Head Atty. Jeffrey Saclot ang orientasyon nga mao ang pinaka-unang kalihokan sa mga kandidata sa 2021 Miss Kuyamis kon diin tumong niini nga sila mahatagan og kahibalo mahitungod sa ngalan ug pagkamugna sa kapistahan sa lalawigan.
Sa tuig 2021 adunay 20 ka mga kandidata ang opisyal nga mosalmot sa ikalima na nga Miss Kuyamis Pageant nga gisugdan niadtong tuig 2017. Nahisgutan sab sa maong kalihokan ang dagan sa kompetisyon, iskedyul sa mga kalihokan lakip na ang proseso sa pagpili sa bag-ong mga mananaog nga magdala sa ngalan sa probinsya sa nasyonal nga kompetisyon.
Matod ni Atty. Saclot nga gawas sa makuhang premyo sa mga mananaog, ang pinaka-nindot nga premyo nga makuha sa mga kandidata mao ang pagdala sa ngalan sa probinsya sa nasyonal nga kompetisyon.
Dugang pa sa ulo sa buhatan nga sa kanunay andam mosuporta ang probinsya sa pagpangulo ni Governor Bambi Emano sa bisan kinsa man nga magdala sa ngalan sa Misamis Oriental didto sa national stage.
Dungan sa ika-91 nga tuig sa pagkatawo sa Misamis Oriental kaniadtong tuig mil nwebesintos traynta 1930 kini na ang ika -siyam ka tuig sa pagsaulog sa probinsya sa Kuyamis Festival human kini opisyal nga gitanyag ni Governor Bambi nga kapistahan sa probinsya sa tuig 2013.
Ang coronation night masaksihan live pinaagi sa Explore MisOr Facebook Page sa alas tres ang takna sa kahapunon sa Adlaw nga Huwebes, Enero 7, 2021. Gumikan sa strikto nga pagpatuman sa mga gabayan isip proteksyon sa matag usa batok sa makapatay nga Corona Virus Disease (Covid-19) ipahigayon ang aktwal nga kompetisyon sa Teatro sa El Salvador City Hall, apan walay live audience ang mamahimong makasulod sa venue gawas sa mga hurado, mga opisyal sa lalawigan, working team ug mga Tourism Officers sa matag munisipyo ug siyudad. (Provincial Information Office)