Nag-iyahay karon og bantay ang taga-nasyonal ug lokal nga gobyerno gumikan sa bag-ong variant sa virus gikan sa gawas sa nasud. Mutation kini sa naunang Coronavirus kung diin gikaingon nga mas makalilisang pa ang igo kaysa sa pirmero. Ginabantayan sa Department of Health ang bag-ong variant sa Coronavirus gikan sa nasud Britanya, South Africa ug Malaysia, partikularminte sa Sabah, Malaysia.
Distansya lang sa Sarangani Province, Gensan, Davao, Zamboanga, Sulu ug Tawi-Tawi area ang Sabah, Malaysia maong gipa-igmat ang mga nanimuyo sa kabaybayunan sa mga tao nga gikan didtua.
Pinakaulahi nga opisyal sa nasud nga nahunusan sa kinabuhi ato lang Enero 6 nga gikabalita nga nataptan sa COVID-19 mao si MMDA chairman ug retiradong heneral myembro sa Magdalo group nga si General Danny Lim sa edad nga 65 anyos. Una na nga namatay tungod sa Coronavirus sila kanhing Manila mayor Alfredo Lim ug kanhing senador Heherson Alvarez.
Sa tibuok kalibutan, lagpas duha na ka milyon (2M>) ang nangamatay tungod sa Coronavirus. Sa Pilipinas, duol sa napulo ka libo (9,909) ang nabugtuan sa kinabuhi tungod sa makamatay nga virus.
Pirme gapahinumdom sa mga Sarangan si Governor Steve Chiongbian Solon kauban ang pito (7) ka mayor, Provincial Health Officer Dr. Arvin Alejandro ug Police Lt. Col Neil Wadingan sa Provincial Contact Tracing Support Group, nga dili kalimtan mag-face mask, face shield, mag-sanitize sa kamot, maligo sa gawas una musulod sa balay, humulan ang gipangsuot sa gawas, dos metros (2m) nga physical distancing sa katapad-kaisturya, ug magpuyo sa balay kung dili importante ang lakaw kaysa magsuroy-suroy. (PIO-SARANGANI)