Nagmalampuson ang gipahigayon nga Business Response and Recovery Planning (BRRP) activity nga gipangulohan sa Oro Trade and Investment Promotions Center (Oro-TIPC) niadtong Marso 11 pinaagi sa online platform.
Tumong sa maong proyekto nga makapahigayon og business coaching and mentoring sa mga Micro, Small, and Medium Enterprises (MSMEs) isip tabang sa gobyerno sa mga gagmay’ng negosyante nga makabawi gikan sa krisis nga dala sa pandemya.
Dul-an 30 ka mga indibidwal gikan sa lain-laing establisemento ang aktibong misalmot sa coaching and mentoring session.
Gitudloan ang mga partisipante kung unsaon pagmugna og plano aron makasustenir sa kita, dili makatangtang og mga empleyado ug makabawi sa mga lugi taliwala sa mga kalisod nga giatubang.
Ang maong kalihukan nahimong posible pinaagi sa pagpaningkamot sa Oro-TIPC inubanan sa USAID – Strengthening Urban Resilience for Growth and Equity (SURGE) Project. (City Information Office)