Cebu City – Mamasko sud sa Evacuation Site sa Brgy. Ibo ang mga pamilya nga nanga guba ang mga panimalay gumikan sa Bagyong Vicky nga mimugna ug dagkong bawod sa kadagatan sa Brgy. Ibo, Lapu-Lapu City.
Mipahigayon na ug intake assessment ang City Social Welfare Development Office (CSWDO) ug gibisita na ni Lapu-Lapu City Mayor Junard Chan ang mga pamilya sa evacuation site, Sabado, Disyembre 19, 2020.
Kini maoy gipahibaw sa pangu sa CSWDO Mrs. Annabeth Cuizon pinaagi sa social media.
Matod ni Cuizon nga na rescue sa City Disaster Risk Reduction Management Office sayo sa kadlawon ang mga molopyo sa tulo ka Sitio sa Apro, Tacan ug Seaside sa maong Barangay.
Kasamtangan nga gipahiluna ang mga pamilya sud sa Ibo Elementary School samtang wala pa silay kapuy-an, labi na ning nag angat ang Pasko.
Giatiman na sab sa kagamhanang lokal sa dakbayan ang ang ilang pagkaon, banig ug ubang nag-unang panginahanglan.
Mipasalig na sab ang mayor nga sigurong mapaspasan ang socialized housing project sa Brgy. Canjulao ug hatagan ug prayoridad ang mga nawad-an ug panimalay.
(Jhon Tadlip/JTY, photo courtesy by Annabeth Cuizon)
(Source: City Social Welfare Development Office)