Cebu City – Gipangkeha sa Land Transportation Office o LTO-7 ang mga dealer sa motorsiklo nga giingong mi-falsify sa mga dokumento nunot sa gihimong imbestigasyon.
Nahinabi sa media, si Director Victor Caindec miingon nga ilang gisang-at ang mga kaso human makita sa ilang pakisusi ang daghang kalapasan sama sa withholding sa registration documents sa mga pumapalit nga wa pa maka impas pagbayad, pag-isyo og minaomaong resibo ug posibleng tax evasion.
Suma pa ni Caindec, daan nang nag-atubang og administrative case ang mga motorcycle dealers sa kapakyas pagtuman sa registration regulation ug karon kasong criminal nagyod.
Determinado ang opisyal nga moabot sa korte ang mga kaso kay daghan nang pumapalit ang nabiktima sa modus sa hiwing mga dealers.
Ang mga biktima wa pahibaw-a nga aduna silay katungod pagkuha sa temporary plate number sa dili pa marehistro ug pagdawat sa tanang dokumento human ma-process sa dealer.
Una niini, si LTO Assistant Secretary Edgar Galvante mirekomendar sa pagpasaka og kaso sa mga dealers taliwa sa hulga sa pandemya. (Jhon Tadlip/JTY)
(Source & photo courtesy of LTO-7)