Cebu City – Gipadaplin ni Lapu-Lapu City Mayor Junard “Ahong” Chan ang iyang plano pagtugot nga mahibalik ang mga international flights sa MCIA o Mactan-Cebu International Airport.
Nakahukom niini si Chan nunot sa taho sa pagkatap sa bag-ong matang sa coronavirus sa United Kingdom.
Gawas niini, giiswag usab ni Chan ang miting nila ni Gob. Gwendolyn Garcia aron unta pagtuki sa mga sumbanan sa pagpabalik sa biyahe sa abyon gikan ug paingon sa abroad.
Suma pa ni Chan, gikatakda unta ang ilang tigum ni Garcia niadtong Dis. 29 apan gioktaba ngadto sa unang semana sa Enero.
Matod ni Chan, ilang desisyonan ang pagpadayon o dili sa maong lakang paglabay sa Enero 15 diin posible nga aduna nay mga kaugmaran bahin sa bag-ong strain sa virus.
Kagahapon gitakdang makigtagbo si Chan sa kadagkoan sa MCIA aron pagtuki bahin sa travel ban sa mga nasod nga apektado sa bag-ong matang sa virus.
Una niini, gianunsyo sa tagduma sa MCIA nga sugod gahapon gipugngan na ang mga pasahero gikan sa mga nasod nga adunay new variant sa SARS-CoV-2 agig tuman sa resolution 90 ug 91 sa national IATF o Inter-Agency Task Force.
(Jhon Tadlip/JTY, photo courtesy of MCIA)
(Source: Lapu-Lapu City Public Information Office)