Pinaneknekan dagiti mannalon ti Brgy. Saoit ti ili a Burgos a dakkel ti ngimmatoan ti apit dagitoy iti pannakaisayangkat ti ‘’soil restoration program’’ iti daytoy a panawen ti panagmumula ti pagay.
Inbunannagda a nupay nabayagen dagitoy nga agtaltalon ket saanda pay a napadasan ti nakaapit ti kas iti kaadu ti manamnama nga apitenda iti daytoy a gundaway.
Maibilang kadagiti nangipaay ti testimoniana iti dakkel nga immaduan ti produksionda ita a ‘’cropping season’’ ti president ti gunglo dagiti mannalon iti nadakamat a barangay a ni Mr. Leopoldo Pante.
Kunana a ti iyaadu ti naapitda ti mangpasingked a nagballigi ti programa nga inpatungpal ti gobiern probinsial.
Mainaig iti daytoy, kiniddawda ken ni Gob. Matthew Macos Manotoc a maitultuloy ti nasao a programa iti barangay da.
Mangnamnama dagiti mannalon ti Brgy. Saoit a patgan daytoy ti gobernador para iti naan-anay a pannakaisubliti kinabaknang ti daga iti pagtatalonan dagitoy.
Innayonda a babaen iti daytoy ket agtultuloyen ti adu a maapitda saan laeng nga iti daytoy a panawen ti panagaapit ngem kadagiti sumarsaruno pay a gundaway. (Ronald Domingo, RPN DZRL Batac)
(Source: LGU Burgos, Ilocos Norte)
