Malipayon nga gidawat sa mga benipisyaryo ang mga gitunol nga mga kahimanan ug makinarya alang sa Casket Making nga nagkantidad sa 1.5 milyones ka pesos.
Usa sa benipisyaryo nga nakadawat, mao si Ramil Gahisan kinsa nagpasalamat nga nahidangat na ang ila nga gipangandoy ug mipasalig nga ilang paningkamotan nga mapalambo lakip na sa iyang mga kauban sa trabaho.
Mapasalamaton si Konsehal Amalou Tumapon-Monroyo, Commitee Chairman sa Livelihood, nga nahidangat na ang nasangpit nga proyekto sanglit dugay na kini nga giplano sa mga tawo nga nagpaluyo niini.
Nanghinaut ang Livelihood Chairman nga magamit sa mga benepisyaryo sa insakto ang ayuda nga gihatag sa kagamhanang lokal gumikan kay kini ang kinadak-an nga kantidad nga gitunol sa tanan nga kahugpongan.
Gipaabot usab Konsehal Jezebel “Bing” Balisado ang mensahe ni Mayor Rosalina “Nene” Jalosjos diin sumala pa kini makadugang sa panginabuhian nga taliwala sa pandemya, ug dili angay magpakawala sa paglaum alang sa kalambuan sa dakbayan sanglit kawang lamang ang mga materyales kung walay lumilihok.
Nagkanayon si kanhi kongresista ug Project Monitoring Committee Chairman, Seth Federick “Bullet” Jalosjos, nga dako iyang kalipay ug makapadasig kaayo nga makita ang mga proyekto ubos sa pagpaningkamot sa mga lideres sa syudad nga dako og ikatabang sa mga katawhan.
Nanghinaut ang kanhi kongresista nga modako pa ang maong grupo o kahugpongan aron daghan usab ang mahatagan sa trabaho ug makadawat sa mga serbisyo.
Giasoy usab ni Konsehal Dug Christopher Mah nga dako kini’g tabang alang sa mga tawong walay mga trabaho ilabina nga anaa kita karon sa pandemya ug nagpasalamat nga daghan na nga mga Dapitanon ang nalugwayan og hinabang pinaagi sa Livelihood.
Mitambong sa maong higayon isip pagsuporta sa gitunol nga proyekto mao sila Konsehal Ronie “Pareng Hope” Jarapan ug ABC President Felix Tacbaya lakip na si Livelihood Coordinator Susan Empeynado.
(Source and photo courtesy of CITY INFORMATION DIVISION CID-DAPITAN Facebook page)