Patay ang magtiayon nga sakay sa usa ka bao-bao human mahulog sa pangpang ang gisakyan niini pasado alas 4 sa hapon kagahapong adlawa didto sa Bypass Road, Purok-1, Sta. Ana, Barangay Casisang, Malaybalay City.
Ang maong bao-bao, usa ka Blue Rusi Tricab, nagtangag og plakang numero 125KQB, nga gimanehuan sa 38 anyos nga bana, samtang sakay ang 36 anyos nga asawa niini.
Sumala sa report, nga gikan sa ilang trabahuan, partikular sa DOLE Plantation nga nahimutang sa Sitio Gabunan, Barangay Casisang, Malaybalay City ang mga biktima ug pauli na sa ilang panimalay, sa dihang pag-abot sa lugar, partikular sa palugsong ug kurbadahon nga bahin sa kadalanan, kalit nalang nawad-an og control ang drayber sa gimanehu niini, hinungdan sa disgrasya.
Wala pay swerteng nahulog sa pangpang nga adunay katas-on og 11 metros ang maong bao-bao lakip na usab ang mga biktima kinsa nakahiagom og mga grabeng injury sa kalawasan.
Diha-dihang gidala sa Bukidnon Provincial Medical Center ang mga biktima sa mga miresponding medical team apan pulos nakabsan sa kinabuhi samtang ginaatiman sa mga doctor.
Nagpabilin usab sa lugar ang gisakyang bao-bao sa mga biktima.
Gipahiluna na sa karon sa punerarya ang mga patay’ng lawas niini.