Cebu City – Gisuspenso sa Ombudsman ang general manager sa MCIAA o Mactan-Cebu International Airport Authority, Atty. Steve Dicdican, tungod sa kalapasan sa Anti-Dummy Law.
Giluwatan ni Ombudsman Samuel Martires ang unom ka buwan nga pagkasuspenso nga way sweldo ni Atty Dicdican.
Nasayran nga nagsumikad ang reklamo sa pag-award sa operation ug management sa tugpahanan sa GMCAC, usa ka consortium tali sa Megawide Construction Corporation (MEGAWIDE) ug GMR Group Megawide, nga usa ka foreign infrastructure company.
Ang maong concession deal molanat og 25 ka tuig nga adunay pundo nga ₱ 14.4 bilyon.
Nasayran nga ang proyekto gitumong sa expansion ug sa operation sa tugpahanan nga naglakip sa pagtukod og bag-ong passenger terminal, uban sa tanang associated infrastructure facilities; rehabilitation ug expansion sa karaang terminal, ingon man sa pagtaod og kagamitan sa information technology ug ubang pasilidad.
Apil usab niini ang operation ug maintenance sa passenger terminal sud sa concession period.
Tungod niini, milutaw nga ang nag-operate, nag-administer ug nag-manage sa MCIA mao ang Irish, Ghanaian ug pipila ka Indian nga adunay dakong kontrol sa Philippine public utility, butang nga nakalapas sa Anti-Dummy Law.
Gawas kang Dicdican, gisuspenso usab og unom ka buwan sa anti-graft body ang ubang opisyal sa MCIA. (Jhon Tadlip/JTY)
(Source & photo courtesy of Office of the Ombudsman of the Philippines)