Gihulat na lamang sa General Santos City Police Office ang resolusyon sa piskalya, kalabot sa gipasakang kasong kriminal batok sa gitudlong suspek sa pagpusil sa coordinator sa MERS Business Center nga si Jonard Closas Barlizo.
Sa pakighinabi sa RPN DXDX GenSan, gikumpirma mismo ni GSCPO chief, P/Colonel Gilberto Tuzon nga love triangle ang motibo sa maong krimen.
Gasalig naman si Tuzon nga bug-at ang mga ebidensiya batok sa suspek nga giilang si Rolando Pagurayan Colendres, human nga mismong ang biktima ang positibong mi-ila sa identity niini.
Si Colendres ang positibong ginganlan mismo sa biktima nga maoy mipusil kanila niadtung adlaw’ng Biyernes, July 9 sa bahin sa NLSA Road corner Nunez Street, sa Barangay San Isidro.
Base sa imbestigasyon, magka-uban sa MERS ang biktima ug ang suspek.
Si Barlizo ang nagpabilin pa karon sa balay-tambalanan. (John Rey Somido)