Cebu City- Positibo sa coronavirus disease o Covid 19 ang lima ka kawani sa karaang Basilica Minore del Santo Niño sa dakbayan sa Sugbo.
Tungod niini, subling gipahibawo sa tagdumala sa simbahan ang pagpabiling serado sa basilica.
Segun sa advisory sa simbahan, nadawat nila ang kasayoran gikan sa ilang health office.
Matod sa advisory, migawas na ang resulta sa swab test sa kombento niadtong Mayo 29 ug sa health center sa brgy. Tinago niadtong Hunyo 1.
Milutaw sa record nga gikan sa 41 nga gi-test, lima ang positibo sa virus.
Ang lima nga nataptan sa Covid 19 nagpabiling asymptomatic ug gahapon anaa na kini sa ika-13 ka adlaw sa kwarantina.
Pero samtang gipahiluna pa ang containment measures ug nga walay paring Agustino nga nagpositibo, ang tagdumala sa simbahan miingon nga nakahukom sila pagpabiling serado sa basilica aron kalikayan ang pagkatap sa virus.
Nag-ingon usab ang abiso nga dili pa nila ablihan ang simbahan kay ilaha pang palimpyohan ang tibuok compound sa basilica ug pahugtan ang safety procedures & protocols.