Nanawagan karon ang Provincial Government sa Sarangani ug ang partner niini nga SOCSKSARGEN Masonic Foundation ngadto sa mga may sakit nga goiter ug danlak nga mupailalum sa libre nga prescreening una mahitabo ang free surgical mission sa bulan sa Abril nga ipatigayon sa usa ka charity foundation nga ang main office ang naka-base pa sa nasud Taiwan gitawag nga Tzu Chi (tsu-tsi) Foundation.
Segun ni Ms. Asma Akmad, ang program manager sa Serbisyong Sarangan Community Outreach Program ilalum sa opisina ni Governor Steve Chiongbian Solon, ug ni Mr. Ronnie Lalas, ang spokesperson sa SOCSKSARGEN Masonic Foundation, ang prescreening alang sa mga taga-Sarangani Province ang mahitabo karong Marso 17 sulod sa municipal hospital sa Kiamba ang Dr. Cornelio Martinez Sr. Memorial Hospital, ang Level I municipal hospital sa Sarangani Province.
Dawaton ang adunay Goiter nga dili toxic ug kadtong may balatian nga Hernia kon danlak o luslos, apil na ang may Hydrocele, kadtong may tubig sa itlog, ug Varicocele, kadtong may barikos sa itlog.
Muadto lang sa Kiamba Municipal Hospital sa Marso 17. Kadtong dili makahabol sa schedule, pwede adtuan ang Gensan Emergency Hospital ang Dr. Royeca Hospital sa March 11 hangtud March 13. Paga-abagahon sa Provincial Government sa Sarangani ang galastuhan sa laboratory. Libre ang pag-opera, pati ang tambal matud pa hangtud mamaayo ang libre ihatag sa Tzu Chi Foundation ug sa SOCSKSARGEN Masonic Foundation katugbang ang ubang partners.
Advance na lang pud nagpabalo si Ms. Asma sa mga taga-Sarangani Province nga kadtong may diperensya sa ngabil, ang bungi ug ngoho, cleft lip-cleft palate, lakip na ang may clubfoot kon napilo nga lapa-lapa, ang magpalista na pinaagi sa ilang mga barangay health worker ug municipal health office tungod pwede na kini nilang ma-refer sa mga partner organization nga kanunay kaabag sa Sulong Kalusugan program ni Governor Solon.