Cebu City- Gisubay karon sa mga tinugyanan sa panglawas asa na ang 26 ka Koreano nga ming-abot sa tugpahanan sa Maktan sa milabayng gabii gikan sa Daegu, ang epicenter sa coronavirus disease kun Covid 19 sa South Korea.
Kini ang gipahibawo ni Dr. Terence Anthony Bermejo, pangu sa Bureau of Quarantine kun BOQ-7.
Sumala pa ni Bermejo, ang naasoyng mga langyaw giisip nang PUM kun persons under monitoring nunot sa pagpatuman sa nasod sa travel ban sa North Gyeongsang province sugod gahapon.
Ang Daegu usa ka siyudad sa North Gyeongsang province sa South Korea.
Matod pa ni Bermejo, gihimo na nila ang pagpanghipos sa health declaration forms sa maong mga pasashero nga sakay sa direct flight gikan sa Daegu ngadto  saMactan Cebu International Airport (MCIA).
Nagkanayon si Bermejo nga ila pang gisubay ang nahimutangan sa nahisgotang mga Koreano ug kon ilaha kining makit-an, ila kining tambagan nga magpabilin lang una sa ilang nahimutangan kay ilaha lang ipaubos sa monitoring.
Pero kon magpakita kini og mga timailhan sa virus, matod ni Direktor Jaime Bernadas sa DOH 7, ihatod nila sa ospital.