Gitakdang magpasiugda ang kagamhanan sa dakbayan sa Lapulapu og simulation sa pagpamakuna batok sa Covid 19 sa sunod semana.
Suma pa sa tigpamaba sa Department of Health o DOH 7, Dr. Mary Jean Loreche, makatabang ang simulation aron mahimong epektibo ang pagpamakuna ilabi na kon mahibaw-an ang gidugayon sa pagbakuna sa usa ka tawo.
Matod ni Loreche, kinahanglang himoon ang simulation aron maseguro nga ang gihan-ay nga proseso ug protocol dili na mausab.
Si Loreche usa ka sakop sa COVID-19 Vaccination Advisory Council ug consultant sa Lapulapu.
Nagkanayon siya nga ang matag usa kinahanglang mopaubos sa pre-registration, registration, actual vaccination, ug actual time sa pag-obserbar sa bisan unsang epekto human sa pagbakuna.
Sa iyang bahin, si Mayor Junard “Ahong” Chan mitataw hinuon nga pagka karon, wa pa makapili ang kagamhanang local unsa nga brand ang paliton.
Una niini, gibutyag ni Chan nga naggahin ang siyudad og P100 ka milyon sa procurement COVID-19 vaccines.
Pero magpaabot una sila sa rekomendasyon sa DOH sa dili pa sila modesidir. l via Jhon Tadlip/ JTY
Source/Photo: Lapu-Lapu City PIO