Nagpadajun kuman an pagsaka sa kaso sa Human Immunodeficiency Virus kon HIV sa dakbayan sa Surigao human nagpa gawas nan report an buhatan sa City Health Office sa pagpanguna ni Dr. Benjielita Notada an City Health Officer II atol sa International Aids Candle Lights Memorial Day sa City Hall ground kagahapong adlawa.
Sa presentasyon ni Jessica Nepomucemo an Nurse III/ City HIV/Aids Coordinator nasayran nga sa 2023 jaon na sa 46 ka indibidwal an may kaso sa HIV kompara sa 2004 nga jaoy isa (1), 2012 lima (5), 2013 duha (2), 2014 unom (6), 2015 walo (8), 2016 pito (7), 2017 disishete (17), 2018 traynta (30), 2019 kinse (15), 2020 napuyo (10), 2021 unom (6) ug 2022 kwarentay dos (42) sa kinatibuk.ang 195 ka kaso sa HIV.
Kasagaran nga may sakit an mga layaki kompara sa babaje nga diin amo inin tag tawag nga homosexual. Kasagaran nag edad nan 15 ngadto na sa 34 anyos.
Sa 2016 duha an patay, 2018 duha, 2019 isa, 2020 duha, 2022 isa hampan sa 2023 duha.
Sa mensahe ni Jessica Nepomucemo nagkanayon nga pwede mapugngan an HIV kung likayan an pakig hilawas sa pareho nga layaki ug jaoy mga guidelines nga sundon.
Nanawagan si Dr. Benjielita Notada sa mga jaoy HIV nga sila andam motabang ug mosuporta sa buhatan sa City Health Office sa ingani nga mga kaso. Dugang pa nija nga magpabilin ini nga confidential sa publiko.
Mapasalamaton si Dr. Benjielita Notada maingon man an tibuok pwersa sa City Health Office ngadto na sa mga personahe sa Department of Health sa kanunay nga pagsuporta sa ilang mga programa. (Mark James Lisondra)