Cebu City – Luwas na nga nahimutang sa Lapu-Lapu City Sports Complex ang 21 sa 26 ka mga trabahante sa usa ka scrap buyer nga mipaabot sa ilang reklamo nga unfair labor practice batok sa ilang employer.
Personal nga gi rescue ni Mayor Junard Chan ang maong mga empleyado nga naglakip sa driver, scrap manager, truck boy ug uban pa gikan sa balay nga ilang gi-stayhan sa Cebu NKC Trading pagka tungang gabii sa Mayo 20, 2021.
Ang maong mga trabahante gikan sa Negros ug Leyte kinsa ang uban mi-angkon nga parente ra sila sa ilang amo, nag trabaho gikan sa duha ka tuig ngadto na sa 17 ka tuig ang kina dugayan.
“Ang una nilang reklamo kay ang sweldo nila matag adlaw nga P200 lang kung diin ang ilang duty kay gikan sa alas 7 sa buntag hangtod sa alas 5 sa hapon. Pa trabahuon pa gyud sila sa Sabado ug Domingo nga half day apan dili sila pagabayran og overtime pay,” matod ni Mayor Chan labot sa ilang sitwasyon.
Hinoon, ang driver mi-angkon nga P500 ang ilang sweldo matag adlaw, pero wadwad sab ug dunay mga higayon nga sobra sa walo ka oras ang trabaho, apan walay overtime pay.
“Naglabi kanila nagtrabaho na sa kompanya sa 3 hangtod 5 ka tuig ug ila na lang giantos ang maong gamay nga pa sweldo kay gikan man sila sa Negros, Leyte o sa mga gagmay nga lungsod nga mas lisod pod ipangita ang trabaho. Wala sad silay madawat nga mga benepisyo sama sa SSS, Philhealth o Pag-ibig,” dugang ni Chan.
Gibutyag sab sa maong mga trabante nga ang pagkaon nga gihatag sa tag-iya ngadto nila baho baho na nga delata nga tuna, gumikan kay duha na ka tuig kini nga na expired.
Kini tungod kay wala silay laing mabuhat kundi sa pagkaon na lang niini kaysa mag antos nga magkutoy ang ilang mga tiyan.
Gipasalig ni Chan nga samtang anaa pa sila nagpasilong sa Sports Complex, siguraduhon niini nga maatiman sila ug mahatagan sa ilang panginahanglanon.
Atoa nang gi-imbetahan ang tag-iya sa kompanya para masulbad ni nga issue ug mahatagan ang mga empleyado sa ilang makiangayon nga sweldo ug benepisyo kay anaa man silay katungod ubos sa atong balaod,” matod sa mayor. (Jhon Tadlip/JTY)
(News & photo courtesy of Junard “Ahong” Chan)