Si Kanhi Mayor Vicente “Dongkoy” Emano midawat sa challenge sa pagpamuno sa usa ka localized peace negotiation tali sa gobierno ug sa Communist party of the Phils-New People’s Army- National Democratic Front (CPP-NPA-NDF) sa probinsya sa Misamis Oriental.
Si Emano sa iyang kabahin nagsugilon nga dili masugdan ang maong localized peacetalks kon walay guidelines nga ipagala gikan ni Presidente Rodrigo Duterte. Gusto ni Emano nga siya magiyahan sa mga limitasyon alang sa maong panagsultihay.
Gidugang usab sa pagsugilon sa 75 anyos nga political kingpin ug founder sa local political party nga Padayon Pilipino nga kinahanglan gayod nga adunay kasabutan una sa managlahi nga partido sa dipa magsugod ang negosasyon.
Kon madumduman si Gobernador Bambi Emano sa Misamis Oriental nag-issue sa memorandum nga naghangyo sa iyang amahan, kinsa nagsilbi isip consultant sa kapitolyo sa peace and order nga mamuno sa maong peace talks sa higayon nga mogula na ang guidelines niini gikan sa National Government.
Ang amahang Emano adunay kasinatian sa ingon niini nga hisgutanan sa local level uban sa communist party niadtong 1986.