Cebu City- Gimandoan sa Coa o Commission on Audit ang gobyerno sa probinsiya sa Sugbo nga pangayoan og katin-awan ang mga opisyal nga responsable sa pagbaligya sa kontrobersiyal nga CICC o Cebu International Convention Center sa walay pagtan-aw sa existing regulation sa COA.
Sa nasayran, niadtong 2018, ang pamunoan ni kanhi gobernador ug karon Bise Gob. Hilario Davide, III mibaligya sa propyedad ngadto sa kagamhanan sa dakbayan sa Mandaue sa kantidad nga 300 milyones pesos.
Kon mahinumdoman, natukod ang CICC sa kantidad nga ₱800-milyones niadtong 2006 isip venue sa ika-12 nga summit sa ASEAN o Association of Southeast Asian Nation pagka 2007.
Apan pagka 2013, mitay-og ang 7.2 magnitude nga linog nga gisundan sa super typhoon Yolanda hinungdan sa kadaot nga nahiagoman sa CICC.
Sukad niadto wala na gyod kini ayoha ug gipasagdan na lang tungod usab sa nag-ung-ong nga kaso labot sa katukoran sa maong edipisyo.
Pagka 2017, ang Sanguniang Panlalawigan ug ang Sanguniang Panlungsod sa Mandaue mihatag og pagtugot pagbaligya sa CICC ngadto sa naulahi nga gipresentahan ni kanhi Mayor Luigi Quisumbing.
Apan gikwestiyon sa COA ang transaksyon nga gipaagi sa negosasyon bisag walay failed bidding. via Jhon Tadlip/JTY