Sa ikawalo na regular session nan Sangguniang Panlungsod-Ciudad Surigao na taghimo sa Marso 3, 2020, naimbitahan an pipila ka mga ahensia na may kalambigitan sa project na pagtukod nan 3 storey building nan MARINA o Maritime Industry Authority sa suyod nan PPA Port sa BilangBilang, Ciudad Surigao.
Ini tungod sa pagguba sa matud pa 75 anyos na parola. An mga mitambong amo sila si Yolanda Tan, nag represent sa PPA- Port Management Office Surigao, Phil. Coast Guard Commander Lawrence Roque, MARINA Regional Director Atty. Manuel Portus sanan DPWH na tagrepresentahan ni Engr. Ben Serna.
Didto isab sila City Tourism Officer Roselyn Merlin, City Admininistrator Atty.Jerry Centro, City Legal Officer Atty. Manuelito Delani, COA City Auditor Regiemar Tabina sanan Engr. Gil Rufino Menor nan City Engg Office.
Sa paghisgut nahibaw-an na tagpaguba nan Marina an Parola base lamang sa komunikasyon sa Higher Headquarters nan PCG, na naglaong na wayay ila pag alkontra sa tinguha nan MARINA na gub-on an parola, bisan pa man kun wayay demolition permit gikan sa ciudad, clearance para sa demolisyon gikan sa COA, o bisan gamay na courtesiya ngadto sa lokal na pangagamhanan.
Nahibaw-an isab na nagsugod na pagpatrabaho sa project bisan waya pay aprubado na building permit gikan sa City Engineering Office.
Tagpadumduman ni Konsehal Atty. Noel Christian “Toti” Catre an kabahin sa RA 10066, an National Culture Heritage Act nga nagpahimutang nan protection sanan conserbasyon sa national culture heritage pareho nan jadton tagguba na parola, na posible panubagon nan mga hingtungdan.
Nosulti isab an City Administrator Jerry Centro na kinahanglan ipatindog pagbalik an tag guba na parola pinaagi sa pag construct nan replica did-on ra sad sa daan na nahimutangan sa Bilang Bilang, na gastuhan nan MARINA.
Tagsumpayan ni Konsehal Joshua Emilio Geli na ipasuspenso na anay an pagtrabaho sa building hangtud na matukod an replika nan Parola.
An session kasamtangan na tagdumaya ni konsehal Atty Cacel Azarcon isip temporary presiding officer iban sa mga konsehal: Atty Danilo Menor, Atty. Noel Christian Toti Catre, Victor Borja, Mario Gesta, Leonilo Aldonza, Sebastian Ric Bastie Nagas, ABC Rico Nagas, Joshua Emilio Geli, Joseph Joey Yuipco, sanan SK President Janree Gonzales.
Tipik sa pag hisgut sa isyu sa pag guba sa parola didto sa session nan Sang. Panlungsod