Suspendido an klase sa enterong kabikolan nin huli sa peligrong idudulot kan Bagyong Paeng, mantang nagkukusog an uran delikado sa mga pagbaha.
Mala ngani ta si Camarines Norte Gov. Ricardo Padilla nagpalowas na nin directiva na suspendido an klase sa gabos na level sa public and private schools kasuodma Octobre 27, huli kan makusog na ragasa kan uran, kasumpay kaini nagsugo naman siya nin tulos na preemptive evacuation sa mga residentes na yaon sa high-risk areas.
Miyentrastanto sa probinsya nin Camarines sur, si Governor Vincenzo Renato Luigi Villafuerte, nagpalowas naman nin kasuguan kasuodma suspendido na an klase sa gabos na level paramas matawan nin bastanting oras an mga paratukdo na masiguro na ligtas an saindang mga classrooms asin makaandam sa posibling evacuation.
Mantang sa ipinahayag ni Gov. Villafuerte egwa nang mga lugar na binabaha sa bali pitong mga banwaan.
Kasumpay kan baretang ini si Mayor Rex Oliva kan cuidad nin iriga,nangapudan naman sa saiyang mga constituents na nakaestar sa mga pangpang kan salog asin sa mga binabahang baranggay na maging andam sa pag evacuar.
Miyentrastanto pinagbawalan naman an mga saradit na mga parasisira na dai magpalaot sa kadagatan huli kan makusog na alon sa dagat, maging an tourist activities hiking, mountaineering, diving, an temporaryomenting naka banned sa ngunian. (Joey H. Lim, photo courtesy of PAGASA)