Mas pinaigting pa ng Public Employment Service Office (PESO) Albay ang pagpapahusay ng social skills ng mga mag-aaral sa pamamagitan ng Special Program for Employment of Students (SPES) program.
Ang SPES ay isa sa mga programang pangkabataan ng Department of Labor and Employment (DOLE) na naglalayong bigyan ang mga benepisyaryo ng oportunidad na makapagtrabaho tuwing bakasyon upang matulungan ipagpatuloy ang kanilang pag-aaral sa alinmang kurso ng sekondarya, kolehiyo o technical-vocational institution.
Ayon kay Ely P. Salting, Albay-PESO Manager, ang programang ito ay hindi lamang nagbibigay ng tulong pinansyal kundi nagbibigay din ng mahahalagang social skills at work ethics na magiging kapaki-pakinabang sa kanilang mga kinabukasan.
“Ang programang ini mahihiling ta na talagang nakakatabang sa pag-eskwela bako lang ini sa financial aspect, na ti-train ta man po sinda kung pano maki-halubilo sa mga ibang tao pag-abot sa deployment ninda sa baranggay. Nati-train po sinda sa mga tigtataong assignments, mga task na tig-deligate sainda na beneficial sa saindang future careers,” paliwanag ni Salting.
Kaugnay nito, hinikayat naman ng opisyal ang mga benepisyaryo ng programa na sulitin ang pagkakataong ito, mag-aral ng mabuti, at gawin ang kanilang mga tungkulin ng may dedikasyon.
“Inot po we encourage them to perform their task with dedication, na mag follow sa instruction na tig tao sainda, pag na deploy na sinda mag sunod po sa mga tigtatao saindang assignments and then s’yempre matawan nindang importance ining program.”
Samantala, nakatakdang magsimula ang SPES program sa darating na ika-2 ng Mayo.
Source: Albay PIO