Kanselado an mga aktibidad san Daraga Town Fiesta nganang tawn dahil sa padagos na pigpakitang abnormalidad san Bulkang Mayon na mantinidong nasa alert level 3.
Segun ki Mayor Awin Baldo, basado sa naging assessment san Town Fiesta Committee san lokal na gobyerno, napag-desisyunan na i-kanselar na nganay an mga naka-planong aktibidad para sa pag-selebrar san kapistahan ni Nuestra Señora dela Porteria nganang maga-abot na bulan ning Setyembre.
“Muya ta man po na gibun gilayon na makolor dangan maogma an pag-selebrar ta san fiesta, pero sa ngana mas kaypwan ta nganay masyerto an seguridad dangan karayan san satun na mga kaemanwa lalo na po an mga apektado san padagos na pag-alburuto san Bulkang Mayon,” segun ki Mayor Baldo.
Dagdag pa ni Mayor Baldo na apwera sa kaligtasan san publiko, piga-konsiderar man an pondo na gagastuson sa mga aktibidad na pwedeng magamit sa mga programa san LGU dangan sa Mayon Operation kun di’n sa presente, upat na mga barangay o labi sa tres mil na pamilya sa Daraga an nasa evacuation centers.
Segun pa sa alkalde, pigatutukan sa ngana san lokal na gobyerno an mga programa na nagabusol sa pagpakaray san basic services arug san Arangkada Banwa Caravan (ABC), usad na programa na piglansar san LGU na piga-participaran san ngamin na departamento, magalibot sa 54 na barangay sa banwa kada aldaw ning Biyernes para sa obhetong mairani sa mga Daragueño an mga serbisyo san munisipyo.
Mientrastanto, an mga religious activities san simbahan padagos man gilayon dangan susuportaran san gobyerno lokal.
(Source: Daraga PIO)