Iriga City — Maray an pag-apresiar ki Mayor Madel Alfelor kan cuidad nin Iriga sain man ini magduman digde sa Rinconada Area, katakod kan pagpapabisto kaini asin pagpapakusog kan saiyang lideres sa kandidatura kaini bilang kongresista sa 2022 elections.
Iyo ini an inako ni PB Marc James Temenia, matapos na maka-olay kan radio ronda kasabay kan kompirmasyon na ini an mas nagpapakusog sa saindang grupo nganing mas pang itindog an bandera kan oposisyon sa Rinconada area.
Kinompirmar pa ni Temenia na pinagsaro na ninda an gabos na lideres sa cuidad kan Iriga huli sa pagsaro kan dating magkaralaban na Alfelor.
Inot kaini, harus dinuman na kan grupo ni Mayor Madel an anom na banwaan sa ika-limang distrito asin liwat na pinagtitipon an mga dating lideres poon kan saiyang ama na si difuntong congressman Boboy Alfelor mga tugang na sinda Nancing asin Manny Alfelor.
Siniguro pa ni Temenia na tataw’anan ninda nin maray na laban maski dai nagdagos si VP Leni Robredo sa pagdalagan bilang gobernador kan CamSur.
Dai pa man masabi ni Temenia kun si dating Vocal Banez na an tunay na kandidato ninda sa pagka-gobernador O magkakaigua pa nin substitution.
