Siyam ka pamilya o 36 ka residente ang nawad-an og pinuy-anan human sa usa ka pre-dawn fire nga misunog sa sa Purok 2, Barangay San Roque, Sirawai niadtong Biyernes, Agosto 21.
Walay namatay, nasamdan, o nawala sa insidente, sumala sa Bureau of Fire Protection (BFP)-Sirawai.
Nakadawat ang BFP-Sirawai sa fire alarm alas 4:28 sa kaadlawon ug miabot dayon sa lugar. Gideklarar ang first alarm alas 4:32 a.m. samtang paspas nga mikaylap ang kalayo sa mga balay nga magkaduol.
Sa inisyal nga assessment, lima ka balay ang hingpit nga nangasunog samtang upat pa ang partially damaged. Lakip sa mga naapektuhan ang balay nga gipanag-iya ni Ronald S. Montemor.
Mitabang sa pagpalong ug pagkontrol sa sunog ang mga bombero gikan sa BFP-Sirawai, BFP-Siocon, ug personnel sa Municipal Disaster Risk Reduction and Management Office (MDRRMO) sa Siocon.
Na-control ang sunog alas 5:45 a.m. ug hingpit nga napalong alas 6:10 a.m., human sa kapin usa ka oras nga operasyon sa mga responder.
Gibanabanang 195.41 square meters nga residential property ang naapektuhan sa sunog.
Samtang nagresponde ang mga bombero, ang mga residente nanggawas sa ilang mga balay aron malikayan ang peligro. Nag-coordinate usab ang mga lokal nga opisyal ug emergency responders alang sa safety measures ug initial assessment sa kadaot.
Gipahimutang ang Incident Command Post sa Barangay San Roque aron mas ma-coordinate ang response operations ug tabang alang sa mga apektadong pamilya.
Padayon usab nga gisusi sa mga fire investigator ang lugar aron mahibal-an ang hinungdan ug gigikanan sa sunog.
Bisan pa sa dakong kadaot sa kabtangan ug pagkapapahawa sa siyam ka pamilya, wala nay gitaho nga casualty sa insidente. Gidasig usab sa lokal nga mga awtoridad ang padayon nga pagtabang sa mga apektadong pamilya samtang nagsugod sila sa pagbangon ug pag-rebuild sa ilang mga balay.(IKEN B. GULLEM)
Source: Zamboanga del Norte Provincial News Network