Maayo na lang nga nakapatukod si Mayor Oscar Moreno sa usa ka infectious facility sa Brgy. San Simon sa milabay nga mga bulan kay nakaabag kini karon sa nasinating surge sa COVID19.
Tungod kay ania man sa CDO ang mga dagkong private ug public hospitals, dire gadalhon ang mga pasyente nga severe cases gikan sa ubang parte sa rehiyon hilabina sa Northern Mindanao Medical Center (NMMC) nga maoy referral hospital sa COVID19.
Sa pagka karon, dili lang mga taga-CDO ang mga COVID19 patients sa mga hospitals apan lakip na ang mga gikan sa silingang probinsya ug kalungsuran.
Tungod kay nakita ni Mayor Moreno nga posibleng musaka ang kaso samtang wala pa masumpo ang pandemya sa tibuok nasud, nangandam kini pinaagi sa pagtukod sa CEREID facility ug pagdugang sa COVID19 wards sa JR Borja General Hospital (JRBGH).
Ang NMMC ubos sa pagdumala sa Department of Health samtang ang JRB General Hospital ubos sa LGU CDO ang operation niini.
Ang JRBGH usa ka Level 1 hospital ug dili unta kini referral center sa COVID19 apan naningkamot ang LGU CDO nga makaserbisyo pa gihapon kini sa mga COVID patients. Gani, dugang 40 beds ang gatukoron karon sa Pimentel Bldg sa JRBGH aron maakomodar pa ang mga pasyente.
Samtang sa Brgy. Lumbia, kamulo sab ang LGU CDO sa pagtukod sa usa ka satellite hospital nga gilaumang makatabang sa pag-responde ning pandemya.
(Gin B. Serohijos, RPN DXKO CdO OIC | City Information Office)