Napahigayon ang usa ka mahinungdanong kalihokan, usa ka Inauguration and Blessings Ceremony alang sa bag-ong gibuksan nga Multi -Purpose Hall ug Behind Bars Bakery sulod sa pasilidad sa Bjmp Dipolog City Jail Male Dormitory, sa may alas 10:00 ang takna sa buntag, Agosto 14, 2024.
Ang maong seremonya gisugdan sa usa ka misa ug gisundan kini sa hamubo nga programa nga gipangulohan ni Jail Warden JCINSP ARVIN DAN R AGUITO kauban ni PROVINCIAL JAIL ADMINISTRATOR MANUEL U CALIBO, ug gitambungan kini sa mga opisyal sa gobyerno pinaagi ni Konsehal Praxides Rubia nga maoy nag representar sa Mayor ning dakbayan sa Dipolog nga si Mayor Darel Dexter T. U, kauban sa Barangay Kapitan sa Dicayas nga si Kapitan Jebone, ug sa pakigtambayayong sa buhatan sa Department of Science and Technology 9 (DOST-IX) nga gipresentahan ni Mr. Nuhman Aljani, mga personahe sa buhatan sa Department of Trade and Industry, TESDA, mga personnel sa Bjmp Dipolog City Jail Male Dormitory ug sa pipila ka mga PDL’s sulod sa pasilidad ug gisaksihan sa mga personalidad gikan sa Media.
Ang programa nagtutok sa kapasidad ka kahibalo sa mga PDL pinaagi sa pagpresentar ug pagpaila sa ilang mga produkto nga nabuhat nga usa sa mga kahinguhaan sulod sa pasilidad isip kabahin sa livelihood program nga ubos sa pagdumala sa TESDA ug diin ang mga PDL nahatagag kahigayonan sa pagbansay sulod sa pasilidad aron sa ingon niini sila maila nga mga produktibong indibidwal nunot sa ilang kahimtang sulod sa lawak.
Pipila sa mga produkto nga gipasigarbo sa nasangpit nga pasilidad nga Behind Bars Bakery, mao ang bread and pastry diin ang mga PDL mismo ang nagbuhat sa maong mga produkto nga ibaligya ngadto sa kadaghanan.
Muabot sa kapin 50 ka mga PDL ang nipailawom sa training program sa ahensya sa TESDA nahimong tulay alang sa kalampusan sa mga PDL sa pagbuhat sa maong mga produkto.
Sa maong kalihokan si Konsehal Praxides Rubia nipadayag sa iyang pagpasalamat ngadto sa nagpaluyo ug nagmugna sa inisyatiba nga makatabang ug makapa benepisyo sa mga PDL’s sulod sa pasilidad.
Sa samang higayon si Jail Warden JCINSP AGUITO nipadayag usab sa iyang pasalamat ngadto sa mga mitambong ug misaksi sa kalihokan ug ilabi na sa ahensya sa DOST IX, kinsa migahin ug igong pundo alang sa pagtukod sa bag-ong umaabot nga proyekto alang sa pasilidad sulod Bjmp Dipolog City Jail Male Dormitory.
Nasayran nga adunay pipila ka mga indibidwal ang migahin ug pundo alang sa pagtukod sa mga bag-ong pasilidad nga gipaluyohan ni Mayor Allen Ferrater sa Jose Dalman ug sa kapikas niini nga Mrs.Rachelle Ferrater ug ni Councilor Gesor “Bugoy” Dalman.
Sa katapusang bahin sa programa ang mga opisyal ug mga personahe sa Bjmp Dipolog City Jail Male Dormitory nagpasalamat sa Lokal nga kagamhanan ug sa mga ahensya sa hugot nga supporta ngadto sa mga PDL’s sa ilang tinguha nga mahatagan sila ug kahigayonan nga bisan sila anaa sa sulod sa pasilidad aduna silay kapasidad nga makamugna ug mga produkto nga mabenepisyohan sa kadaghanan. (Medalyn U. Borja)