Iligan City – Gipa-abot karon sa kapulisan Sapad Municipal Station ang pamilya sa mga 7 ka patay’ng lawas nga napalgang gilubong, niadtung nakalabay’ng Domingo sa Sitio Lapao, Barangay Karkum, Sapad, Lanao del Norte.
Matud ni Sapad Municipal Police Station Commander Major Alibsar Daraba nga subay sa ilang gihimong inisyal nga imbestigasyon, upat ka lalaki ug tulo ka babae ang patay’ng lawas nga ilang napalgan sa maong lugar.
Palgan nga gilubong ang 7 ka patayng lawas, 4 ka lalaki ug 3 ka babae, alas 9 sa buntag, Enero 7 sa may Sitio Lapao, Barangay Karkum, Sapad, Lanao Del Norte.
Naila ang mga biktima nga sila si: Joselito Gaviola, Marly Gaviola, Elvie Gaviola Lenara, Epifanio Lenara, Jopay Lenara, Jomar Lenara ug Epifanio Lenara Jr. ug residente sila sa Purok Dama de Noche, Sitio Luguimit, Poblacion, Margosatubig, Zamboanga del Sur.
Ang mga patayng lawas sa biktima anaa karon sa Funeral Homes sa Kapatagan, Lanao Del Norte alang sa post mortem examination.
Sa pagkakaron padayon pa gihapon ang mga kapulisan sa pagtino sa hinungdan sa maong panghitabo.
News and Photo courtesy of Sapad Municipal Police Station