Impannakkel ni Provincial Veterinarian, Dr. Loida Valenzuela, nga iti intero a Luzon ti laeng Ilocos Norte ti nakapagtalinaed iti presio ti karne ti baboy sipud iti unos ti tawen 2019 agingga kadagitoy a gundaway.
Inbunannagna a magatang ti karne ti baboy manipud iti sanga gasut walo pulo a pisos agingga iti dua gasut duapulo a pisos ditoy probinsia idinto a kadagiti dadduma a lugar a pakairamanan ti Metro Manila ket umab-aboten ti tallo gasut agingga iti tallo gasut limapulo a pisos iti kada kilo.
Inlawlawagna a daytoy ket gapu ta awanen ti baboy kadagiti nadakamat a lugar.
Segun kan ni Valenzuela iti agdama ket maysa ti Ilocos Norte a mangsup-supplay ti karne ti baboy iti Cagayan, Isabela, Nueva Ecija, Ilocos Sur, La Union, Benguet, Pangasinan, Tarlac, Pmpanga ken Bulacan.
Impalgakna nga adda ti balakad kenkuana ti central office a mang-regulate iti iseserrek dagiti ‘’traders’’ ditoy probinsia.
Mainaig iti daytoy, kunana nga adda ti planona a mangipadanon ken ni Gob. Matthew Marcos Manotoc iti detalye ti rekomendasionna ti Sang. Panlalawigan a maregulate kadagiti sumrek a traders ditoy Ilocos Norte.
Imbatadna a mabalin a maiyisyu ti ID card kadagiti maseknan a mangsertipikar a dagitoy ket’’accredited’’ iti gobierno probinsial.
Malaksid iti daytoy, inbunannagna a masapul dagiti laeng ASK free farms ti mabalin dagitoy a paggatangan tapno saan a maserrek dagiti ‘’backyard raisers’’ a mangpapataud iti kasapulan ti probinsia.
(OIC Rodrigo Sadian, RPN DZRL Batac)
(Source: Provincial Agriculture Office)