Tatlong establisyimento na ang pansamantalang ipinasara ng Department of Environment and Natural Resources sa Roxas Boulevard matapos madiskubre na walang waste water facility treatment ang mga ito.
Kasabay ng pagsisimula ng Manila Bay Rehabilitation Project, inisyuhan ng closure order ang Aristocrat Restaurant sa Ermita, Maynila, Gloria Maris Restaurant malapit sa Folk Arts Theater at Esplanade sa Mall of Asia Complex sa Pasay City.
Inilabas ang kautusan sa pamamagitan ng Laguna Lake Development Authority bunsod na rin ng paglabag ng mga nabanggit na establisyimento sa Philippine Clean Water Act of 2004.
Bago isilbi ang closure order, nagsagawa muna ng clean-up drive ang DENR katuwang ang iba pang government agency at mga local government unit bilang bahagi ng rehabilitasyon na target tapusin sa loob ng tatlong taon.
(with report from Aya Yupangco)
