NAPATAY sa pwersa sa gobyerno ang pinakataas nga lider ug most wanted nga terorista nga si Myrna Sularte o mas naila nga Maria Malaya atol sa engkwento sa 901st Infantry Brigade sa hinterlands didto sa Sitio Imelda, Barangay Pianing sa Butuan City bandang ala 1:20 sa hapon gahapong adlawa, Myerkules, Pebrero 12, 2025.
Si Sularte, lumad kini nga taga Bayugan City, Agusan del Sur, mao ang nagsilbing kalihim sa communist terrorist groups’ (CTG) Northeastern Mindanao Regional Committee (NEMRC) ug miyembro sa Political Bureau of the Communist Party of the Philippines (CPP).
Sigun sa taho nga nagsugod ang engkwentro alas 6:10 sa buntag hangtud alas 6:30 sa buntag sa susamang adlaw diin nasakmit sa mga tropa ang mga butang ug kagamitan nga gipanag-iya sa grupo ni Malaya. Samtang pagkahapon, laing binayloay sa buto ug armas na usab ang natigayon nga miresulta sa kamatayon niini.
Si Maria Malaya mao ang asawa ni anhing Jorge “Ka Oris” Madlos, kinsa usa ka iladong lider sa New People’s Army (NPA) National Operations Command (NOC), kinsa napatay niadtong Oktubre 2021 sa engkwentro batok sa pwersa sa gobyerno sa Bukidnon.
Siya ang nag-operate sa rehiyon sa Caraga ug Northern Mindanao, diin siya ang responsable sa daghang mga kagubot, lakip ang pagpatay sa mga sibilyan, pagguba sa mga gamit sa gobyerno, ug uban pang mga teroristang kalihokan sa mga probinsya sa Surigao ug Agusan.
Nag-atubang usab kini og daghang mga kasong kriminal, lakip ang rebelyon, pagpatay, daghang pagpatay ug frustrated murder, ug uban pa.