Usa sa gi-atngan nga segment sa MunaTo Festival online celebration karong tuiga mao ang “I Survived COVID.” Matigayon kini karong Lunes, Nobyembre 30, alas dyes y media sa buntag (10:30am) ug alas sais y media sa gabii (6:30pm), kung diin madunggan ug makita live sa Facebook page sa MunaTo Festival ang mga testimonya sa mga COVID-19 survivor sa probinsya sa Sarangani, ang mga dili katiaw-tiawan nga kasinatian sa mga survivor sa COVID-19, usa na niana si Malapatan Mayor Jun Sumbo.
Lakip sa muhatag sa iyang never-before-heard story and testimony si Maam Donna Panes, ang curriculum implementation division chief sa DepEd Sarangani, usa pud sya ka COVID-19 survivor.
Samtang, karong Sabado, Nobyembre 28, alas dyes y media (10:30 AM) sa buntag, i-presenta ang pundasyon sa Sarangani Province gikan sa pagkamugna tuig 1992 panahon nila Congressman James Lee Chiongbian ug Gobernadora Priscilla Chiongbian.
Alas sais sa gabii (6 PM) karong Sabado gihapon, tagaan og pag-ila ang mga frontliner sa Sarangani Province, ang gibansagan nga mga modernong bayani. Pagka-Nobyembre 29, alas dos sa hapon (2 PM), matigayon ang “Kastulen.” Panaghisgot kini kabahin sa mga katikaran sa kultura. Ang host ani nga event mao mismo si Malungon Mayor Tessa Constantino nga gikan usab sa mga kaigsoonang lumad.
Alas sais sa gabii (6 PM) sa Nobyembre 29, laing panaghisgot ang makita mupadayag sa kahimtang sa turismo sa Sarangani. Unsay gibuhat sa mga tourism site aron malabanan ang epekto sa pandemya.
Kada gabii, sugod alas syete sa gabii (7 PM), Nobyembre 28 hangtud Nobyembre 30, adunay mga pakulo, padula ug pa-premyo gi-organisa ang Sulong Kabataan program ni Governor Steve Chiongbian, kaabag ang TM, Globe ug Talk ‘N Txt. Adunay Museo de Sarangani Tiktok Challenge, Hula MunaTo What’s in the Box-Alam MunaTo Who U? Where Na U? Ang Gulo, ug ang Hakoot MunaTo Municipal Quiz Bee. (Provincial Information Office – Sarangani)