Nagpabilin matod pang abli ang General Santos City government sa rekomendasyon sa local medical community nga ibalik sa enhanced community quarantine (ECQ) status ang siyudad.
Sa usa ka pamahayag, giasoy ni City Mayor Ronnel Rivera na ang maong opsiyon ang padayong gitunan ug gibalanse sa City-IATF, taliwala sa padayong bahad sa Covid-19 incidents.
“We are open to these recommendations but we have to balance it with our economy, ”ang tipik sa pamahayag ni Rivera.
Hinuon, aminado ang amahan sa siyudad nga posibleng dili na makasugakod ang mga residente, higayon nga ipatuman ang “hard lockdown” gumikan sa epekto niini sa panginabuhian.
Dugang pa sa local chief executive, daan nang nagkagidlay ang ekonomiya sa GenSan sa mga gipatumang travel restrictions ug border control og posibleng samot pang maglisod higayon nga ibalik sa ECQ ang siyudad.
Sa bagong datus sa Department of Health, miambak na sa 4,875 ang citywide tally, diin, 566 sa mga niini ang nagpabilin pa sa mga balay-tambalanan.
Samtang, gikumpirma sa DOH ang 4,155 nga total recoveries, lakip na ang 70 nga bagong mga survivors. (John Rey Somido)