Cebu City- Nakapauli na sa ilang tagsatagsa ka probinsiya sa milabayng adlaw ang 124 ka LSI o locally stranded individuals nga natanggong sa Cebu tungod sa quarantine restrictions.
Sumala pa sa CPA o Cebu Port Authority, ang maong mga LSI paingon sa Cagayan de Oro, Surigao, Masbate, Nasipit-Agusan del Norte, Dumaguete City, Dapitan, ug Tagbilaran City.
Sa usa ka advisory, ang CPA mitug-an nga ang 124 ka LSI nga kompleto na sa dokumento nakasakay na sa barko padung sa ilang mga lalawigan sa unang adlaw sa pagpaubos sa Cebu City sa GCQ o General Community Quarantine.
Ang mga LSI nga padung na pauli gilangkoban sa 65 ka paingon sa CDO, 23 sa Surigao, 17 sa Masbate, 16 sa Agusan del Norte, duha sa Dumaguete City, Negros Oriental; duha sa Dapitan City, Zamboanga del Norte; ug usa sa Tagbilaran City, Bohol.
Sa nasayran, niadtong Hunyo 19, gisuspenso sa DILG o Department of Interior & Local Government ang outbound ug inbound travel sa mga LSI sa Cebu City dihang gibalik kini pagpaubos sa ECQ o enhanced community quarantine.
Ug pagka Hulyo 31, mihatag na og pagtugot ang DILG sa pagpabiyahe sa mga LSI sa mga dapit ubos sa GCQ sama sa Cebu City, Talisay City, ug mga lungsod sa Consolacion ug Minglanilla; ug kadtong ubos sa modified GCQ. I via Jhon Tadlip/ JTY
(Source: Cebu Ports Authority)
