Sa managlahi nga okasyon, duha (2) ka dagkong opisyal ang bag-uhay lang nibisita sa probinsya sa Sarangani sa katauhan nila Department of Health XII Regional Director Doctor Aristides Tan ug TESDA Secretary Isidro Lapeña.
Human sa paglusad ni Secretary Lapeña sa programa nga IPEACE (i-peace) kon Indigenous People as Empowered Agripreneurs towards a Collective End niaging Hunyo 23 sa Purok New Bohol, Barangay Alegria lungsod sa Alabel, nasundan pa ang iyang inter-aksyon sa mga local official human nga nahimong host ang Sarangani Province sa pagpanguna ni Governor Steve Chiongbian Solon sa ika-walo (8th) nga meeting sa RTF-ELCAC (el-kak) o Regional Task Force to End Local Communist Armed Conflict.
Ang ELCAC ang alayon sa Executive Order No. 70 ni Pangulong Rodrigo Duterte nga walay laing tumong kundili maundang na ang insurhensya sa Pilipinas pinaagi sa whole-of-nation approach kon pagtinabangay sa tanang sektor aron nga ang tanan nga anaa sa laing grupo ang mu-surender na sa sabakan sa gobyerno ug manginabuhi nga malinawon kauban ang pamilya.
Gikalipay ni Ms. Lizette Lopez, peace and order focal person ilalum sa Sulong Kapayapaan program ni Governor Solon, ang makanunayon nga pagbisita sa mga taga-Malakanyang, hilabi na ni Secretary Lapeña isip sya man ang gituboy ni Presidente Duterte nga maoy Cabinet Officer for Regional Development and Security para sa Rehiyon Dose.
Samtang, sa bag-uhay lang nga pagpahigayon og Sarangani Provincial Health Board meeting, anaa mismo nitambong si DOH XII Regional Director Tan kauban ang mga mayor sa Sarangani Province ug mga board member, sa pagsuporta nila Vice Governor Elmer De Peralta ug nila Senador Manny ug Congressman Ruel Pacquiao.
Segun ni Doctor Arvin Alejandro, ang provincial health officer, ilang gihan-ay ang kasabutan sa probinsya ug sa pito (7) ka munisipyo aron mulig-on pa ang pagpatuman sa gipirmahan ni Pangulong Rodrigo Duterte nga balaod Republic Act No. 11223 o Universal Health Care/UHC Law.
Nasabutan nga adunay seed fund kon pasiunang pondo ibutang sa special health fund sa pag-implementa sa Universal Health Care Law aron aduna dayon magamit ang mga LGU gawas sa mga minilyong pondo nga ibubo sa nasyonal nga gobyerno. Ug tuod man, nipasalig si Governor Solon nga mugahin og Tres punto Singko Milyon ka pesos (₱3.5M), tag-Five Hundred Thousand pesos (₱500K) kada munisipyo.
Aduna pay muabutay nga Usa ka Milyon ka pesos (₱1M), mahimo ng ₱4.5 Milyon ka pesos sa kinatibuk-ang seed fund.
Nalangay ang pagpatuman sa Universal Health Care gumikan sa pag-abot sa Coronavirus pandemic. Usa sa lakang sa maong programa mao nga ang tanang tao ang libre nga masulod sa Philhealth ug paspas nga matagaan og serbisyong medikal kung ma-admit sa mga hospital.
Subling gihisgutan ni RD Tan nga apil ang Sarangani Province ug South Cotabato sa trayntay-tres (33) ka lugar sa entiro Pilipinas nga unang maka-benipisyo sa Universal Health Care.
Sa maong panagtigum, gi-plastar usab ang mga palisiya aron mapugngan ang local transmission sa COVID-19. Malipayon ang lungsod sa Glan tungod sa deklarasyon sa DOH kagabii nga ang ilang locally stranded individual ang nag-negatibo na sa tulo (3) ka magkasunod nga swab test. Gani, niuli na kini sa ilang panimalay human nga wala nay makitang Coronavirus sa iyang lawas.