Gibutyag ni Engineer Gerald Faciol, ang assistant provincial administrator for operation sa Provincial Government sa Sarangani, nga dakog papel ang local chief executive aron makanunayong makuha ang prestihiyosong award nga Seal of Good Financial Housekeeping nga ginahatag sa DILG National Office matag tuig alang sa mga performing LGU sa entiro Pilipinas.
Gidayig niini si Governor Steve Chiongbian Solon tungod mao matud pa kini ang galatag og direksyon kung asa padulong ang Kapitolyo ug unsay mga palisiya nga ipatuman nga samtang ga-serbisyo sa mga tao ang wala pud nakalapas sa mga balaod, samot na nga walay ginausik nga pondo sa gobyerno.
May criteria ang DILG aron matagaan sa Seal of Good Financial Housekeeping. Una, mao nga limpyo ang record sa LGU didto sa opisina sa COA kon Commission on Audit, walay adverse findings sa pagdumala sa nakalabay nga mga tuig. Ikaduha, gituman sa LGU ang full disclosure policy pinaagi sa pag-open sa publiko sa mga financial documents timaan sa transparency. Ug ikatulo, ang taas nga utilization rate, wala gipatulog ang pondo inay paspas kining ginagamit para sa kaayuhan sa mga katawhan.
Sa bahin ni Governor Solon, mapasalamaton na lamang kini sa padayong pagtinabangay sa mga kaubanang opisyales ug sa mga empleyado sa Kapitolyo nga makahatag og sakto, ligdong ug limpyo nga pagpanerbisyo padulong sa gihandum nga God-centered Prosperity. Sa iyang adlaw nga natawhan kagahapong adlawa, nagpasalamat ang Gobernador sa gipakita nga padayong panaghiusa sa mga taga-Sarangani Province. Gani, kumpleto ang pito (7) ka mga mayor nga nitimbaya ug nisabay sa gamay nga salo-salo nga gi-prepara sulod sa Kapitolyo kagahapon, kuyog usab ang pamilya ni Governor Solon sila Maam Michelle ug ilang mga kabataan.
