Cebu City- Gibaharan ni Cebu Governor Gwendolyn Garcia nga i terminate ang contract sa upat ka contractor kung mapakyas sila sa pag human sa ilang gi assign nga road projects.
Gitakda nga makig tagbo pag usab si Garcia sa mga contractors karong Disyembre 10, pagsuta kung maka human ba sila sa deadline.
Niadtong Nobembre 15, nakig tigom si Garcia tali sa Provincial Engineering Office ug mga pribadong contractor nga gitahasan sa pag implementa sa mga infrastructure project sa Kapitolyo.
Kini human masayri sa gobernador nga daghang mga road improvement projects ug uban pa nga gigastohan sa Kapitolyo wala pa maka abot ug 50 porsento sa ilang trabaho.
Naglakip kini sa mga proyekto sa San Fernando, Sibonga, Carcar City, Samboan, Barili, Borbon, Sogod ug Tabuelan.
Gibutyag sa mga representanti sa mga kompaniya nga ang kalangan gumikan sa kakuwang sa ilang manpower ug equipment.
Gihatagan ug ultimatum sa gobernador ang mga contractor Nobembre 19, pag address sa maong concern ug gipahinumduman sila sa pagsiguro nga humanon ang maong mga proyekto sa gikasabotan nga schedule.
Sa higayon nga mapakyas, dii na kini hatagan ug kahigayonan nga maka salmot sa mga umaabot nga bidding sa mga proyekto sa lalawigan.
“Unta inyong gibutangan og enough manpower ug enough equipment. Kung nahimo sa uban, nganong di man ninyo mahimo ninyo?” mensahi sa gobernador.
Matod sa inahan sa lalawigan nga karon na lang katapusan nilang chance.
Dili kini maoy unang higayon nga mihatag ug ultimatum si Garcia ngadto sa mga contractors labot sa pagka langay sa mga infra projects.
Kahinumduman nga niadtong tuig 2020 mihimo sab ug samang lakang ang gobernador.
(Source/Photo: Cebu Provincial Government)