Tuig kapin na dihang nasinati ang nagkalain-laing epekto sa aspeto sa kinabuhi gumikan sa COVID-19 nga padayon pa nga gipakigbisogan, gipakigbatokan hangtod karon panahona.
Gumikan niini si Gobernador Bambi Emano walay pakyas nga nag-apela sa tanan nga mga Misamisnon nga mag-amping ug sundon kanunay ang mga protokol ug mga panudlo sa kahimsog nga gitakda sa gobyerno labina karon nga ang grabe nga makatakod nga virus nga nahitabo na sa mga kasikbit nga dakbayan sa probinsya.
“I hope you too will realize that COVID-19 is not a joke especially with the Delta Variant,” matud ni Gobernador Bambi.
Niadtong Hulyo 16, 2021 nag-isyu ang National IATF og Resolution No. 127-E nga ang probinsya sa MisOr gibutang ilawom sa klasipikasyon sa General Community Quarantine (GCQ) nga molungtad hangtod Hulyo 31, 2021 tungod sa makaalarma nga pagkadetektar sa Delta Variant sa Cagayan de Oro ug Gingoog City.
Pinauyon sa Centers for Disease Control and Prevention (CDC), ang Delta Variant, nga nailhan usab nga B.1.617.2 mahimong mas dali nga mokaylap. Aduna kini mga pagbag-o sa spike protein nga naghimo niini nga mas simple nga makatakod sa mga cell sa tawo, sumala sa pagtuon.
Kini nagpasabot nga kung adunay usa nga mataptan sa virus, mahimo sila nga makatakod ngadto sa lima ngadto unom ka tao.
Sulod sa isa ka tuig ug upat ka bulan gikan ang probinsya nagproklamar og state of calamity gikan Marso 9, 2020 ang probinsya sa Misamis Oriental nga gipangulohan ni Gobernador Bambi kauban ang punoan sa IATF sa Lalawigan nga si Dr. Jerie Calingasan nagpabiling lig-on ug karon epektibo ang mga pagpaninangkamot nga makita sa pagminus sa kaso sa COVID-19 sa probinsya ning panahona.
Taas ang paglaom ni Gobernador Bambi Emano nga pinaagi sa hugot nga koordinasyon ug kooperasyon sa mga kawani sa gobyerno ug tanan nga mga kalungsuran sa probinsya lakip ang pagtubag sa panawagan nga magpabakuna walay imposible nga dili maluwas ug makalingkawas ang katawhan sa lalawigan niini nga pandemya.
(Source: Misamis Oriental Provincial Information Office Facebook page)